«دماغه متسوحة.. وطير عربيتين بـ 50 مليون».. مجدي عبدالغني يشن هجومًا ناريًا على أحمد فتوح

فتح مجدي عبدالغني، نجم الأهلي السابق، النار على أحمد فتوح، ظهير أيسر الفريق الأول لكرة القدم بنادي الزمالك، وذلك بعد واقعة خروجه من معسكر الفريق بداعي مرض عمه، من أجل حضور حفل المطرب راغب علامة، في الساحل الشمالي.

وكان جون إدوارد المدير الرياضي لنادي الزمالك، قرر بعد التشاور مع عبدالناصر محمد مدير الكرة، تغريم أحمد فتوح مبلغ مليون جنيه، وإيقاف مستحقاته وتحويله للتحقيق نظرًا لما بدر منه بالظهور في إحدى المناسبات العامة دون الحصول على إذن.

وقال مجدي عبدالغني، في تصريحات تلفزيونية عبر فضائية «الشمس»: «المفروض أحمد فتوح، ميشوفش طريق الساحل الشمالي، مش يروح حفلة ويقول رايح أزور عمي! هو ده اسمه كلام! ونادي الزمالك يطلع بيان ينفي!».

وأضاف: «مفيش حاجة بقت بتستخبى في عالم السوشيال ميديا، أحمد فتوح، لما شاف حد بيصوره خبى وشه الناحية التانية عشان خايف حد يشوفه لأنه عارف أنه عامل حاجة غلط».

وتابع: «ياراجل إنت رايح وسط ملايين البشر، أكيد الناس هتشوفك، إنت داماغك دي مودياك فين، في ناس دماغها متسوحة، فتوح، عنده إمكانيات كبيرة، وممكن يكون من أغنى اللعيبة في مصر، ولا هو اكتفى بالفلوس اللي خدها خلاص؟ ده إنت طيرت عربيتين في حوادث بحوالي 50 مليون جنيه، والناس تعبانة».

وأتم: «أنا بحبك والله، أنت لعيب مستواك عالي جدًا، بس لازم تحافظ على نفسك وعلى ناديك».