«عيب وانت بتعمل كدة لأغراض شخصية».. خالد الغندور يفاجئ أحمد شوبير برسائل نارية

وجه خالد الغندور لاعب فريق الزمالك السابق، رسائل مفاجئة لأحمد شوبير نجم الأهلي السابق، على إثر الجدل الدائر بينهما، بسبب صفقة انتقال وسام أبوعلي مهاجم الأحمر، لكولومبوس الأمريكي، خلال فترة الانتقالات الصيفية الجارية.

كان أحمد شوبير، قال في تصريحات تلفزيونية عبر فضائية «الأهلي»: «واحد طالع يقول عرفونا وسام أبوعلي اتباع بكام، انت مالك؟ انت مال سعادتك؟ النادي الأهلي أدرى بحاله، وعارف هو بيعمل إيه، وده اللي مخليه ناجح وواخد أربعة أفريقيا من اخر ستة بطولات».

يأتي هذا بعدما كتب الغندور عبر صفحته على «فيسبوك»: «يجب على النادي الأهلي الإعلان الرسمي عن ثمن بيع وسام أبوعلي واللي هيتم وضعه في الميزانية».

وأوضح: «وعن المبلغ اللي هيحصل عليه ناديه السابق من الصفقة، بعيدًا عن الكلام المرسل على مواقع التواصل الاجتماعي، وكل واحد بيضرب الرقم اللي يعجبه».

ورد الغندور على شوبير، في فيديو بثه على صفحته الرسمية على «فيسبوك»: «حد قالي أحد الإعلاميين الكبار علق على كلامك وبيهاجمك وبيقولك انت مالك، علشان تصريحاتي عن صفقة وسام أبوعلي للنادي الأمريكي، الصراحة استغربت خصوصا إنه إعلامي كبير والإعلامي الكبير لازم يدعم الصح».

وتابع: «في أي دولة في العالم يتم الإعلان عن قيم انتقالات اللاعبين، زي مرموش وصلاح ومبابي وغيرهم»، مضيفا: «وسام أبوعلي فاضل لسة 4 سنين في عقده ولوى دراع النادي ومراحش التمرين ومحضرش الجلسات ومسافرش المعسكر والأهلي قال وسام مش للبيع بنبص لقينا هيتباع لأمريكا اللي أقل سعر مقارنة بالريان والوصل، إيه المشكلة لو الأهلي يعلن عن تفاصيل الصفقة؟».

واستكمل: «هل ده حاجة عيب هل دي حاجة غلط؟ هل الفلوس دي مش هتخش ميزانية النادي؟ وأنا مش فاهم اللي بيخبي بيخبي ليه؟ واللي بيدافع عن الغلط بيدافع ليه؟».

وأضاف: «مش ده مال عام؟ مش دي شفافية، واللي بيقول انت مالك! أنا إعلامي في قناة عامة وراديو عام وبتكلم على كل الأندية وانتقدت أحمد فتوح بل طالبت ببعيه مع أنه بيلعب في نادي أنا كنت كبتنه».

وأكد: «هذا الإعلامي اللي ببيقول انت مالك هو هو اللي 90% من كلامه بيكون عن الزمالك وعن النادي المنافس ومشاكله وفلوسه بيجيبها منين وكل ده في قناة فئوية، وكل اللي في القناة بيتكلموا عن الزمالك والمفروض يتكلمو عن ناديهم».

وأشار: «انت زعلان أوي وأنا بتكلم في قناة عامة وتيجي تقولي انت مالك ملكش دعوة؟ والله عيب انتوا أكبر من كدة وعيب تكون بتدافع عن غلط وبتهاجم اللي بيتكلم في الصح».

وعلق الغندور على الفيديو، من خلال صفحته الرسمية: «مرة أخيرة أنا أتكلم فيما يعنيني كإعلامي ولا أهاجم أي إعلامي ولا أحجر على رأي أي شخص كل واحد حر طالما بيقول الحق والصح ولكن للأسف البعض بيهاجم الصح لغرض في نفسه لا يعلمه إلا الله المطلع على النوايا وفي النهاية أي حد بيشتم أو بيتطاول على شخصي أتمنى له الهدايا والأخلاق الحميدة عشان عمري ما هعرف أرد بقلة ادب ولا لسان متدني».