«مستحيل حد يدفع المبلغ ده».. شوبير يكشف تطورات تجديد فتوح في الزمالك

كشف أحمد شوبير حارس مرمى الأهلي ومنتخب مصر السابق تطورات تجديد عقد أحمد فتوح نجم منتخب مصر والزمالك داخل القلعة البيضاء.وقال أحمد شوبير في تصريحات إذاعية اليوم الأحد: "إمبارح تردد كلام إن أحمد فتوح عايز 50 مليون جنيه منحة تعاقد عشان يجدد عقده مع نادي الزمالك، والرقم ده كبير جدا على أكبر الأندية في مصر ولا بيراميدز ولا الأهلي يقدروا يدفعوه وبقول لك الكلام ده بالفم المليان".وتابع شوبير: "الزمالك مستحيل يديك المبلغ ده حتى لو السماء انطبقت على الأرض طيب أحمد فتوح هل عنده عروض؟، ممكن خاصة من ليبيا طيب هناك ممكن يدوه المبلغ ده اه ممكن جدا".وأوضح شوبير: "لو فتوح مشي أخر السنة وراح نادي في ليبيا ولا الخليج حد هيلومه..؟ لأ لإن الولد عقده خلص وعنده سنوات قليلة في حياته هيلعبها واللي زي فتوح ده معملش فلوس وعايز يأمن مستقبله".وأضاف شوبير: "هل فتوح ممكن يروح لنادي في مصر ما يروح أيه المشكلة بس اللي أنا متأكد منه مفيش نادي في مصر هيدفع له المبلغ ده، هتقول لي ممكن بيراميدز يدفع هقول لأ لإن بيراميدز نزل بسقف الرواتب والصفقات، وعندهم أعلى حاجة محمد الشيبي وده محترف وله وضع خاص وفلوس بتبقى مرتفعة شوية عن باقي لاعبي الفريق".واختتم شوبير: "فتوح قد يكون لديّه عرض في ليبيا وهو لا يملك أي عروض مصرية وأتوقع الدنيا هتظبط مع فتوح".