«طلع أسرار الأهلي».. أحمد بلال يؤيد قرار الخطيب بعدم توجيه الشكر لـ غالي

كشف أحمد بلال نجم الأهلي ومنتخب مصر السابق، عن كواليس مثيرة بشأن استبعاد حسام غالي من قائمة محمود الخطيب رئيس القلعة الحمراء التي ستخوض المعترك الانتخابي المقبل، مؤيدًا لـ قرار الخطيب بعد توجيه الشكر لـ غالي بعد استبعاده من القائمة.

وقال أحمد بلال في تصريحات عبر قناة «النهار»: «كابتن حسام غالي ممكن نتفق أو نختلف عليه على المستوى الشخصي، ولكن على المستوى الإداري هل هو ظُلم داخل النادي الأهلي؟ قولا واحد لا».

أضاف: «حسام غالي سنة ونصف مبيحضرش اجتماعات مجلس الإدارة ولا لجنة الكرة وهو عضو في الاتنين».

تابع: «أنا هقولكم سر من الأسرار عن حسام غالي وهو إن كابتن محمود الخطيب كان بيعمل اجتماعات مجلس الإدارة مفتوحة بسبب غيابه وهو ما كان سيؤدي إلى فصله أو إسقاط عضويته من مجلس الإدارة، ولكن كابتن الخطيب عمل كده علشان يتفادى الحتة دي ويحافظ عليه داخل مجلس إدارة النادي الأهلي».

وأكمل: «ليه بقول الكلام ده علشان الناس اللي هاجمت كابتن محمود الخطيب بسبب عدم توجيه الشكر لحسام غالي مع باقي أعضاء مجلس الإدارة».

وشدد: «أحنا بننتقد تصرف حسام غالي الإداري وليس على المستوى الشخصي، فأنا بأي شكل أو طريقة أشكرك بعد غيابك عن الاجتماعات لمدة سنة ونصف، والملفات اللي معاك مخلصتهاش وسبتها».

وزاد: «طب هل أنت قعدت معايا على طاولة المفاوضات وقولت مش هترشح؟.. طب هل الحديث اللي اتكلمت فيه قولت إنك مش هتترشح؟.. طب أشكرك إزاي وليه؟ ما أنت بكرة تروح تترشح وده حقك».

وأتم: «أشكرك إزاي وأنت طلعت أسرار مجلس الإدارة كلها بره وتقول إن في صراعات.. طب هو مين اللي جاب حسام غالي مجلس إدارة الأهلي ومين اللي حطه في لجنة الكرة؟ ما هو كابتن محمود الخطيب».